د ګردیز - خوست عمومي مسیر د ١٧ کیلومتره سړک د ترمیم او بیارغونې چارې پیل شوې
د ګردیز - خوست عمومي مسیر د ١٧ کیلومتره سړک د ترمیم او بیا رغونې چارې چې د ا.ا.ا د ټولګټو وزارت او خصوصي سکتور ترمنځ د ١٢٢ میلیونه او ٣٩٨ زره افغانیو په ارزښت قرارداد شوې وې تېره ورځ د پکتیا ولایت د مرستیال والي محترم مولوي محمد انور دین پرور د یاد ولایت د ټولګټو رئیس محترم قاري حسن جان جهادیار او یو شمېر سیمه ییزو مسؤلینو په شتون کې افتتاح او رسماً پیل شوې.
یاده پروژه د پکتیا ولایت له مرکز ګردېز څخه پیل تر غلګي سیمې پورې رسېږي چې په اوږدو کې یې د یوه پایه پل د ترمیم او ٢٧ متره استنادي دېوالونو د رغولو چارې هم شاملې دي.
د یاد سړک د کار په جریان کې به د سیمې یو شمېر اوسېدونوکو ته د کار زمینه برابره شي او د ترمیماتي چارو په بشپړېدو سره به یې د ګردیز او خوست ترمنځ د تلونکو هېوادوالو د تګ راتګ او سوداگريزو توکو د لېږد رالېږد په برخه کې د پام وړ آسانتیاوې رامنځته شي.
