د کابل – میدان وردګ (ارغندۍ – دوراني بازار) سړک د اساسي ترمیم کار پیل شو
![د کابل – میدان وردګ (ارغندۍ – دوراني بازار) سړک د اساسي ترمیم کار پیل شو](/sites/default/files/2023-07/whatsapp_image_2023-07-15_at_2.39.08_pm.jpeg)
د ټولګټو وزارت له لوري کابل – کندهار لویې لارې، د کابل - میدان وردګ برخې د ۲۷ کیلومتره سړک د اساسي ترمیم پروژې کار د یو لړ رسمي مراسمو په ترڅ کې پیل شو.
د د کابل – میدان وردګ سړک پروژې د کار د پیل په مراسمو کې د ا.ا.ا، د ریاست الوزراء اقتصادي مرستیال محترم الحاج ملا عبدالغني برادر، د ټولګټو وزارت سرپرست محترم الحاج ملا محمد عیسی ثاني، د کابل او میدان وردګ والیانو، د سوداګرۍ او پانګونې خونې رئیس محمد یونس مومند او یو شمېر قومي مخورو ګډون کړی وو.
په دې اړه جوړو شویو مراسمو کې د ټولګټو وزارت سرپرست محترم الحاج ملا محمد عیسی ثاني د یادې پروژې اړوند مفصل معلومات وړاندې کړل، ویې ویل: د کابل – کندهار لویه لار ۴۸۰ کیلومتره اوږدوالی، ۷ متره پلنوالی او څلو متره د سړک غاړې لري، چې د یادې لویې لارې په اوږدو کې ۴۶ پایې پُلونه ۱۷۱۶ پایې پُلګوټي شامل دي.
هغه همدارنګه زیاته کړه: ټولګټو وزارت دغه لویه لار د اساسي ترمیم او بیارغونې په موخه په ۷ برخو ویشلې ده، چې نن ورځ یې له ښه مرغه د کابل – میدان وردګ (ارغندۍ – دوراني بازار) برخې د قیر اچونې کار پیل شو.
د ټولګټو وزارت سرپرست همدارنګه، د هېوادولو له صبر او حوصلې څخه مننه وکړه او له خلکو څخه یې وغوښتل چې په دغه برخه کې له ټولګټو وزارت سره همکاري وکړي.
ورسته د یادې پروژې د پرانیستو مراسمو کې د ریاست الوزراء اقتصادي مرستیال محترم ملا عبدالغني برادر د خپلو خبرو پر مهال له قراردادي شرکتونو څخه وغوښتل، چې څومره ژر ممکنه وي، په ښه کیفیت، پوره صداقت او امانتدارۍ سره دې یاد سړک ورغوي هغه همدارنګه قراردادي شرکتونو ته لارښوونه وکړه، چې له خاورو او دوړو څخه د مخنیوي په موخه دې په فرعي خام سړک اوبه وشېندي؛ تر څو د سړک دواړو غاړو پراته کورونو او تلونکي مسافرو ته تکلیف ونه رسیږي.
د یادونې وړ ده، د کابل – کندهار لویې لارې د دغې برخې (ارغندۍ – دوراني بازار) د بیارغونې چارې د ټولګټو وزارت د فني او تخنیکي پرسونل او دوو ساختماني او سړک جوړونې شرکتونو له لوري د شاوخوا اته سوه میلیونه افغانیو په ارزښت پر مخ وړل کیږي.
د کابل – کندهار لویه لار د هیواد یو له مهمو لویو لارو څخه ده، چې په بیارغېدو سره به د هېواد له جنوب څخه مرکز او بیا شمال ته د سوداګرۍ، ترانزیټ او د مسافرو د تګ راتګ په برخه کې ګڼې آسانتیاوې رامنځته شي.