د سالنګونو لویې لارې د بیارغونې چارې په چټکۍ سره جریان لري
د ا.ا.ا د ټولګټو وزیر محترم الحاج ملا محمد عیسی ثاني، د هېواد شمالي ولایتونو ته د خپل کاري سفر په دوام، په داسې حال کې چې یو تخنیکي ټیم یې هم ملتیا کوله، د شمالي سالنګ او جنوبي سالنګ برخو د اساسي بیارغونې له کاري بهیر څخه لیدنه وکړه.
د ټولګټو محترم وزیر لومړی د شمالي سالنګ او ورپسې د جنوبي سالنګ برخو د بیارغونې له چارو څخه لیدنه وکړه. دا مهال د یادې لویې لارې په بېلابېلو برخو کې د اسفالت اچونې، کانکریټ اچونې، د پلونو او پلګوټو جوړولو او د استنادي دېوالونو د جوړولو چارې په چټکۍ سره جریان لري.
د ټولګټو محترم وزیر د یادو پروژو د نظارت او تطبیق کوونکو ټیمونو او همدارنګه د قراردادي شرکتونو مسؤلینو ته لارښوونه وکړه، چې د دغه پروژو چارې د باکیفیته موادو په کارولو، د ټاکل شویو معیارونو مطابق او د ټولګټو وزارت له ټاکل شوي پلان سره سم، د ژمي موسم له رارسېدو مخکې بشپړې کړي.
د قراردادي شرکتونو مسؤلینو هم په سیمه کې شتون درلود او د ټولګټو محترم وزیر ته یې ډاډ ورکړ، چې د روان کال پلان شوې چارې به د ژمي موسم له رارسېدو وړاندې، په لا چټکتیا او د تخنیکي معیارونو په رعایت سره بشپړې کړي.
د یادونې وړ ده، چې د ټولګټو محترم وزیر د هېواد لوېدیځ او شمال زونونو ته د خپل کاري سفر په ترڅ کې له بېلابېلو تر کار لاندو پروژو څخه له نږدې لیدنه او ارزونه کړې ده.
