د ا.ا.ا د ټولګټو وزارت مرستیالانو د ایران اسلامي جمهوریت له سفیر سره وکتل
د ا.ا.ا د ټولګټو وزارت تخنیکي مرستیال محترم الحاج مولوي عبد الکریم فاتح د ایران اسلامي جمهوریت له سفیر ښاغلي علي رضا بیګدلي سره د یاد وزارت د مالي او اداري مرستیال محترم الحاج ملاعبد الحق آخند همکار په شتون کې وکتل او په یو شمېر مهمو موضوعاتو یې خبرې اترې وکړې.
په یاده لیدنه کې د ابو نصر فراهي (میل ۷۸) سړک د شته ستونزو د هوارولو او د یادې پروژې د چارو د چټکتیا او بشپړولو په تړاو خبرې اترې وشوې. دغه پروژه د هېوادوالو او سوداګرو لپاره له مهمو پروژو څخه ده چې رغنیزې چارې یې د ایران هېواد له لوري له وړاندې پیل شوې وې او دا مهال روانې دي.
د ابونصر فراهي بندر له ایران سره د افغانستان له مهمو بندرونو څخه دی چې د میل ۷۸ سړک په بشپړېدو سره به له دې لارې د دواړو هیوادونو تر منځ راکړه ورکړه نوره هم پراخه شي.
په پای کې د دواړو لورو ترمنځ د اقتصادي اړیکو، سوداګریزې راکړې ورکړې او د زېربنایي پروژو په برخه کې پر همکارۍ ټینګار وشو او پرېکړه وشوه، چې په راتلونکي کې دیادې پروژې د بشپړولو په تړاو باید یوه صورت جلسه هم لاسلیک شي.
