د اروزگان سړکونو د جوړېدو لپاره د ارزونې تخنیکي ټیم استول کیږي
د ټولګټو وزیر انجنیر نجیب الله یمين د اروزګان د خلکو له استازي قدرت الله رحيمي سره په خپل کاري دفتر کې د لیدو پر مهال د اروزګانو خلکو ته ډاډ ورکړ چې په لنډو ورځو کې به د دې ولایت د ټولو اړینو سړکونو د هر اړخیزې ارزونې لپاره تخنیکي ټيم واستول شي.
اوس مهال د ترینکوټ ـ کندهار سړک د اساسي ترمیم په موخه تر تخنیکي ارزونې لاندې دی چې د ۲۵ کیلو مټره سړک اساسي ترمیم به یې تر تخنیکي، تدارکاتي او بولۍ پړاونو وروسته پیل شي.
دا سړک د ترمیم لپاره په دوو برخو وېشل شوی چې لومړۍ برخه یې ۱۰ او دویمه برخه یې ۱۵ کیلو مټره ده. د سړک لومړۍ برخه لا هم تر تخنیکي ارزونې لاندې ده خو دویمه برخه یې له تخینکي ارزونې څخه د تدارکاتو پړاو ته تللې چې تر تدارکاتو وروسته به اعلان او د ګټونکي شرکت له خوا به په نږدې وخت کې کار پرې پیل شي.
د یادولو ده چې اروزګان ولایت ته تلونکی تخنیکي ټیم به د ترینکوټ ـ دهراوود، ترینکوټ – چناروتو او ځینې نور سړکونه هم و ارزوي او تر تخنیکي پړاوونو وروسته به یې پر تدارکاتو او عملي چارو کار پیل شي.
