د سرپل ولایت حلقوي سړک د جوړولو چارې په چټکۍ سره جریان لري
دا پروژه چې ۱۲.۵ کیلومتره اوږدوالی لري، د ټولګټو وزارت او یو ساختماني او سړک جوړونې شرکت ترمنځ د څه باندې یو میلیارد افغانیو په ارزښت قرارداد شوې ده او ټاکل شوې، چې په ۱۴۰۷ هـ.ش کال کې بشپړه او ګټې اخیستنې ته وسپارل شي.
یاد سړک د سرپل – شبرغان مسیر اړوند د فیضآباد له سیمې پیلېږي او د آسیاب په سیمه کې د سرپل – سانچارک له لارې سره نښلول کیږي.
دغه سړک ټولټال ۲۱ متره پلنوالی لري چې د تګ راتګ دوه کرښې، د کرښو په منځ کې ګلدان، د سړک غاړې ویالې او پلي لارې په کې شاملې دي.
همدارنګه د دې مسیر په اوږدو کې د ۶۵ پایو پلګوټو د جوړول کار هم شامل دی.
دغه پروژه د سرپل ولایت له مهمو بنسټیزو پروژو څخه شمیرل کېږي، چې بشپړیدل به يې د خلکو ته د تګ راتګ لپاره د آسانتیاوو رامنځ کیدو ، ترافیکي ګڼې ګوڼې کمیدو، د نښلوونکو لارو ترمنځ د اتصال د ښه والي او اقتصادي ودې په برخو کې مهم رول ولري.
