د ټولګټو وزارت د رهبرۍ اصلاحات او جديت د پروژو د چټکتيا سبب شوي
د ټولګټو وزارت د رهبري له لوري د بنسټيزو اصلاحاتو د پروسې تطبيق او جديت د دې سبب شوي، چې د رغنيزو پروژو چارې د پخوا پر تله څو برابره ګړندۍ شي.
دا مهال په ټولیز ډول د ټولګټو وزارت له لوري د هېواد په ګوټ ګوټ کې تر ۱۸۳۰ کیلو متره ډېر سړک رغنیزې چارې روانې دي چې د چارو د سرعت تر څنګ يې د کارونو کيفت او هر اړخیزې څارنې ته هم جدي پام کیږي.
نه يوازې دا چې د رغنيزو پروژو په ورځنیو کارونو کې چټکتيا رامنځته شوې، بلکې په بېلابېلو برخو کې د فساد او وظيفوي غفلت د مخنيوي اړوند پيل شوې مبارزه هم په ډېرې چټکۍ سره روانه ده.
ټولګټو وزارت په دې وروستیو کې ګڼ اصلاحات رامنځته کړي او لا هم د اصلاحاتو په پراختيا کار کوي، تر څو د مرکز په شمول په ټولو ولايتي رياستونو کې هم ياده پروسه تطبيق کړي، او دا چاره د دې سبب شي چې د افغانستان په هره برخه کې د وزارت اړوند پروژې په خپل وخت او تعهد شوي کيفيت سره بشپړې شي.
د بېلګې په توګه د چارو ګړندیتوب د کابل ـ میدان وردګو په دویم لین سړک، د کنړـ نورستان سړک، د لوګر ټانک څخه تر چهل دختران پورې، له غور څخه د هرات پر لوري سړک، د هرات - چشت شریف سړک او د جلال آباد، تالقان او نیلي ښارونو دننه سړکونو کې لیدل کېدی شي.
ټولګټو وزارت خپلو لویو موخو ته د رسېدو لپاره په ټول توان سره هڅه کوي چې د هېواد په ګوټ - ګوټ کې د ټولو پلان شويو سړکونو پروژې په لوړ کيفيت او ټاکلي وخت سره بشپړې کړي، تر څو نه يوازې د سلګونه زره خلکو ټرانسپورټي ستونزې ورسره هوارې شي، بلکې د يوې ټرانزيټي شبکې په توګه د هېواد زراعتي، طبيعي او صنعتي محصولاتو ته د اسانه او ارزانه انتقالاتو پرېمانه زمينې برابرې کړي.
