د پنجشیر والي د ټولګټو له وزیر سره د سړکونو د رغونې او بیارغونې په موخه وکتل
د تولګټو وزارت وزیر انجنیر نجیب الله یمین نن ورځ په خپل کاري دفتر کې د پنجشیر ولایت له والي انجنیر کمال الدین نظامي سره د یاد ولایت د مرکز او پریان ولسوالۍ د سړکونو د بیارغونې په پار ولیدل.
د لېدنې په پیل کې د پنجشیر والي ښاغلي نظامي د ټولګټو وزارت له شته رهبرۍ څخه مننه وکړه او هم یې ورنه د پریان ولسوالۍ له خاوک ـــ پُل شال زور پورې د غځیدلي سړک د بیارغونې غوښتنه وکړه، دغه راز ښاغلي نظامي په ورته مهال له ګلبهار ـــ دوابي درې او یو شمېر نورو سړکونو د رغیدو غوښتنه وکړه.
په ورته مهال د تولګټو وزیر نجيب الله يمين د پنجشير والي ته ښه راغلاست ووایه او ویې وویل: پنجشیر د له مهمو ولایاتو څخه دی، چې د پلازمېنې کابل سربیره ورته د هېواد له یو شمېر نورو ولایاتو هم ګڼ سیلانیان د لېدو په پار ورځي.
ښاغلي يمين د پنجشیر والي ته ډاډ ورکړ، چې د ټولګټو وزات له تګ لارې سره سم به د پنجشیر او ورته نورو ولایاتو سړکونه به په اساسي ډول رغول کېږي.
د وري ۱۴مه، ۱۴۰۰
ټولګټو وزارت ـــ مطبوعاتي څانګه
