د کاپیسا له دانش تر مغان پل پورې د غځیدلي سړک رغنیز کار دوام لري
د کاپیسا ولایت له دانش تر مغان پُل پورې غځیدلی سړک چې ټولټال ۲۰ کیلومتره اوږدوالی لري رغنیز کار یې دوام لري، دا سړک چې په دریو برخو ویشل شوی د یوې برخې رغنیز کار یې بشپړ شوی او په نږدې راتلونکې کې به ګټې اخیستنې ته وسپارل شي خو د پاته دوو برخو رغنیز کار دوام لري.
د سړک دویمه برخه ۶.۷۸۰ کیلومتره اوږدوالی، ۶ متره پلنوالی لري همدارنګه د یاد سړک په اوږدو کې په بیلابیلو برخو کې ۷۱ پایې پُلګوټې او ۲۳۲۳ متره د سړک غاړو لښتې شامل دي چې د څه باندې ۱۱۴ میلیونه افغانیو په ارزښت له یوه خصوصي ودانیز شرکت سره تړون شوی، تر دې مهاله یې د جوړلو کار ۸۱.۴۳ سلنه کاري پرمختګ لري.
د یاد سړک دریمه برخه ۵.۴۵۱ کیلومتره اوږدوالی، ۶ متره پلنوالی لري، په بیلابیلو اندازو کې ۶۲ پایې پُلګوټي، ۵۵ متره استنادي دیوال او ۳۵۳۰ متره لښتې شامل دي چې رغنیزې چارې یې د څه باندې ۷۳ میلیونه افغانیو په ارزښت له یوه خصوصي ودانیز شرکت سره تړون شوی.
ديادوني وړ ده، چې د یادو پروژو مالي لګښت د افغانستان حکومت له ملي بودیجې څخه ورکول کیږي، چې له پلي کیدو سره به یې د سیمې خلکو ته پر کارې بوختیاوو سربیره ترانسپورتې ستونزې هم هوارې شي، د هوا په پاکوالی کې به اغیزمن رول ولري او دغه راز به د کاپیسا ولایت اوسېدوونکې په اسانه ډول ښوونې او روغتیایې چوپړتیاوو ته لاس رسی پیداکړي.
ټولګټو وزارت ـ کابل
د وري ۱۴مه، ۱۴۰۰
