ټولګټو وزارت د سړکونو د ساتنې او څارنې مرستیال د هېواد ختیځ زون ته سفر وکړ
د ا.ا.ا د ټولګټو وزارت د سړکونو د ساتنې او څارنې مرستیال، محترم الحاج معاون ملا عبدالجبار، د یو تخنیکي او مسلکي پلاوي په ملتیا د ټولګټو وزارت د روانو رغنیزو او زیربنایي پروژو د ارزونې، څارنې او کاري بهیر د نږدې کتنې په موخه د هېواد ختیځ زون ته سفر وکړ.
نوموړي د دغه سفر په ترڅ کې په لغمان ولایت کې د ده زیارت پل، د علیشنګ او دولتشاه ولسوالیو پر مسیر د استنادي دېوالونو د جوړولو او د کنړ – نورستان عمومي سړک له رغنیزو چارو څخه له نږدې لیدنه وکړه.
په دغې لیدنه کې محترم معاون صاحب؛ د یادو پروژو قراردادي شرکتونو مسؤلینو او تخنیکي ټیمونو ته د کار د چټکتیا، د ساختماني چارو د لوړ کیفیت، د تخنیکي معیارونو رعایت او په ټاکلي وخت د پروژو د بشپړیدو په اړه لازمې لارښوونې او سپارښتنې وکړې. نوموړي ټینګار وکړ چې ټولې پروژې باید د منظور شویو تخنیکي نقشو او قراردادونو له مخې په شفاف او معیاري ډول تطبیق شي، څو د خلکو اړتیاوې په دوامدار ډول پوره شي.
دغه راز به د ټولګټو وزارت د سړکونو د ساتنې او څارنې مرستیال د یاد سفر په دوام د ننګرهار، نورستان او کنړ ولایتونو د تر کار لاندې سړکونو، پلونو او نورو زیربنایي پروژو څخه هم لیدنه وکړي او د هغو د کاري وضعیت ارزونه به وکړي.
