د دشتارچي – کندز د ۱۹.۶ کیلومتره سړک د پاتې برخو د قیر اچونې چارې جریان لري
د دشت ارچي – کندز مسیر د پاتې برخو د قیر اچونې چارې جریان لري، د سړک دغه پروژه ۱۹.۶ کیلومتره اوږدوالی او ۷ متره پلنوالی لري، چې د ټولګټو وزارت لخوا یې د اساسې رغونې چارې د څه باندې ۴۹۸ میلیونو افغانیو په ارزښت له خصوصي سکتور سره قرارداد شوې دي او دامهال عملاً جریان لري.
د ياد سړک په اوږدو کې د ۵۷ پایې پلګوټو او د ۳۰۰ متره استنادي دېوال د جوړولو کار هم شامل دی او ټاکل شوې ده چې دا پروژه به د ۱۸ میاشتو په موده کې بشپړه او ګټې اخیستنې ته وسپارل شي.
د یادونې وړ ده، چې یاده پروژه اوس مهال ۵۳.۵ سلنه فزیکي پرمختګ لري.
د دشت ارچي – کندز سړک د کندز ولایت له مهمو نښلوونکو سړکونو څخه دی، چې د دشت ارچي ولسوالۍ او دغه راز د تخار ولایت د خواجه غار ولسوالۍ د کندز ولایت له مرکز او شیرخان بندر سره نښلوي.
د دې پروژې د کار په جریان کې د سیمې یو شمېر اوسېدونکو ته د کار زمینه برابره شوې ده، او په بشپړېدو سره به یې د مسافرینو د تګ راتګ او د سوداګریزو توکو لېږد رالېږد په برخه کې ګڼ شمېر اسانتیاوي رامنځته شي.
