د ټولګټو وزارت سرپرست او نوماند وزیر د ننګرهار له والي سره وکتل
د ټولګټو وزارت سرپرست او نوماند وزیر د ننګرهار له والي سره وکتل
د ټولکټو وزارت سپرست او نوماند وزیرانجنیر نجیب الله یمین، د ننګرهار ولایت والي ضیاءالحق امرخیل، سره د سوداګرۍ او ټرانزیت په برخه کې د سړکونو په رول، د خلګو د ټرانسپورټي ستونزو د هواري او سړکنو ته د دوی د لاس رسي په اړه وکتل او خبرې وکړې.
په دې کتنه کې د ننګرهار والي په دې ولایت کې د سړکنو د کموالي له امله د خلګو د ستونزو په اړه خبرې وکړې، او د کابل ـ جلال آباد دوهم لین سړک د پروژو د پاتې برخو د بشپړیدو، د جلال آباد ــ تورخم دوهم لین سړک رغنیزو چارو د بشپړیدو، د تورخم بندر سړک او تأسیساتو رغول، د کامې، ګوشتې، پچیراګام او چپرهار ولسوالیو تر منځ د سړکونو د رغنیزو چارو پیل کیدو، د سړکنو او پلونو د ویجاړې شویو برخو بیارغول، د شینوارو او دور بابا ولسوالۍ تر منځ د ۲۴ کیلومتره سړک د تدارکاتي پروسې ګړندي کول، د عبدالخلیل سړک په مسیر د استملاکې ستونزو هوارول او بیا کتنه، د جلال آباد ــ درونټې سړک د رغنیزو چارو ګړندي کول او د ننګرهار ولایت د ټولګټو ریاست د تجهیز په موخه وسایلو او ماشینرۍ غوښتنې وکړې.
ورپسې د ټولګټو وزارت سرپرست او نوماند وزیر د دې وزارت د پلانونو او یو منل شوي پلان په اړه خبرې وکړې چې د غوره خدماتو چمتو کولو لپاره اصلاحات او بدلونونه راوړي، تخنکې ټیم ته یې لارښوونه وکړه چې: د کابل ــ ننګرهار سړک د استملاک ستونزو د هوارې په موخه د ننګرهار والي په همغږي، د جلال آباد ــ تورخم سړک د چارو د بیا پیل کیدو، له اړوند بنسټونو سره په همغږۍ د تورخم بندر او سړک جوړولو، په یادو ولسوالیو کې د سړکنو او پلونو رغولو، د ټولګټو ریاست د تجهیز په موخه د وسایلو او ماشینرۍ او همدارنګه د خلګو د ستونزو د حل لپاره اقدام وکړي او راپور د وزارت مقام ته وړاندي کړي.
د لیدنې په پای کې، د ننګرهار والي له ټولګټو وزارت سره د امنیت ټینګښت، د پروژو د استملاک او ټولنیزو ستونزو د هواري په برخه کې دهراړخیزې مرستې ژمنه وکړه.