د ټولګټو وزارت سرپرست وزیر د خوست د غلام خان بندر له مسیر څخه ليدنه وکړه

د ټولګټو وزارت سرپرست وزیر محترم الحاج ملا محمد عیسی ثاني خوست ولایت ته د خپل کاري سفر په ترڅ کې، چې د یاد ولایت د ټولګټو رئیس یې ملتیا کوله؛ د خوست د غلام خان بندر مسیر له (بوري، باړي او ميداني) دريو هغو پلونو څخه لیدنه وکړه، چې د وروستيو سېلابونو له امله يې ځينې برخې ویجاړې شوې وې.

د ټولګټو وزارت محترم سرپرست وزیر د خوست ولایت د ټولګټو ریاست مسؤلينو ته لارښوونه وکړه، چې د یادو پلونو د رغونې په برخه کې دې ګوټلي ګامونه پورته کړي او د امکاناتو د نشتون په وخت کې دي له سروې او برآورد څخه وروسته موضوع له مرکز سره شریکه کړي.

ټولګټو وزارت هڅه کوي، چې د لویو لارو، سړکونو او اوسپنیزو کرښو په بیارغونې سره درنو هېوادوالو او سوداګرو ته بشپړې آسانتیاوې برابرې کړي.