د کنړ – نورستان سړک د پاتې برخو د رغونې چارې به ډیر ژر پیل شي
د ټولګټو وزارت سرپرست وزیر محترم الحاج ملا محمد عیسی ثاني ننګرهار، کنړ او نورستان ولايتونو ته د سفر په ترڅ کې د ژیړي بابا، پشد او شیګل له پلونو او د کنړ –نورستان سړک له رغنیزو چارو څخه لیدنه وکړه.
د تولګټو وزارت سرپرست وزیر د یادو پروژو مسؤلینو، تخنيکي ټیمونو او د قراردادي شرکتونو مسؤلينو ته، د یادو پروژو د کار پر وخت د بشپړیدو او د ښه کیفیت او تطبیق په موخه لارښوونې وکړې.
د دغه سفر په لړ کې د تولګټو وزارت سرپرست وزیر د کنړ – نورستان سړک د ۲۲ کیلو متره برخې څخه چې تیر کال یې د رغونې چارې پیل شوې وې؛ لیدنه وکړه او د کنړ – نورستان سړک د پاتې برخو د رغونې په موخه د مهاجر آشنا او حمید کندهار شرکتونو ته خپلې اړوند کاري ساحې ځانګړې کړې دي، چې ډير ژر به یې د رغونې عملي چارې پیل شي.
د یادو پلونو او د کنړ – نورستان سړک د کار په بشپړیدو سره به د سیمې د اوسیدونکو ترانسپورتي ستونزې د پخوا په پرتله هوارې شي او په هوساینې سره به مرکز کابل او د اړوند ولایتونو مرکزونو ته تګ راتګ وکړي.
