له مزارشریف څخه د نهري شاهي ولسوالۍ تر مرکز پورې د سړک جوړلو کار ۵۵ سلنه کاري پرمختګ لري
دا سړک چې ۱۴.۵ کیلومتره اوږدوالی لري د بلخ ولایت له مرکز مزار شریف ښار څخه پيل د یاد ولایت د نهري شاهي ولسوالۍ تر مرکزه بابه قج قار کلي پورې غځيدلی، چې تر دې مهاله یې د جوړلو کار له ۵۵ سلنه کاري پرمختګ سره دوام لري.
د یاد سړک رغنیزې چارې له یوه خصوي ودانیز شرکت سره د څه باندې ۱۴۸ میلیونه افغانیو په ارزښت تړون شوي چې د ټولګټو وزارت له لوري یې مالي لګښت ورکول کیږي.
د یاد سړک د رغنیز کار له بشپړیدو سره به د بلخ ولایت نهري شاهي ولسوالۍ د بلخ له مرکز مزارشریف ښار سره ونښلي او د یادې ولسوالۍ اړوند کلیو د اوسېدوونکو ترانسپورتي ستونزې به هواري شي تر څنګ به یې کرنیز محصولات پر خپل وخت د مزارشریف ښار مارکیټونو ته ولیږدول شي.
همدارنګه د یاد سړک د رغنیز کار پرمهال به د سیمې اوسېدوونکې ته په مسقیم او غیر مستقیم ډول ۱۱۹۶ کاري ورځې رامنځته شي چې له بشپړیدو ورسته به ترې ۷۹۷ تنه په مستقیم ډول ګټه واخلي.
د ټولګټو وزارت ـ کابل
