ټولګټو وزارت سږکال د ژمي په موسم کې د هیواد په بېلابېلو ولایتونو کې د څه باندې ۷۵۷۲ کیلومتره سړکونو څخه د واورې پاکولو پلان لري
ټولګټو وزارت د روان ۱۴۰۳هـ.ش کال د ژمي په موسم کې په ۳۰۲ زیان منونکو سیموکې د سالنګونو او ماهیپر په ګډون د هیواد په ۲۸ ولایتونو کې د څه باندې ۷۵۷۲ کیلومتره سړکونو څخه د واورې پاکولو پلان لري.
د ۷۵۷۲ سړک له جملې څخه څه باندې ۴۵۴۲ کیلومتره سړکونه د ټولګټو وزارت د ولایتي ریاستونو له خوا پاک کاري کیږي او په ( غزني، بامیان، غور، دایکندي، بدخشان، پکتیا، نورستان، پنجشېر، پکتیکا، تخار، سرپل، لوګر، میدان وردګ او فراه) ولایتونو کې ۲۷۲۰ کیلومتره سړکونه چې د ډېرې واورې او زیان منونکو سیمو درلودونکي دي د ټولګټو وزارت د ولایتي ریاستونو د ماشینرۍ سربېره د خصوصي سکټور سره د یو منظم طرزالعمل له لارې قرارداد شوي دي، چې د سږ کال ژمي په جریان کې به له واورو څخه پاک کاري شي.
د ا.ا.ا د ټولګټو وزارت درنو هیوادوالو ته ډاډ ورکوي، چې د ژمي په جریان کې د وزارت اړوندو مسیرونو څخه د واورې پاکولو پلان لري، یاد وزارت له درنو هېوادوالو او موټرچلوونکو څخه غوښتنه کوي، چې له واورینو او زیان منونکو لویو لارو څخه د تېرېدو پررمهال دې ګرم ژمني توکي او تجهیزات له ځان سره ولري، ترافیکي قوانین مراعت، له بشپړ احتیاط څخه کار واخلي او د اړوندو لویو لارو د موظفینو لارښوونو ته جدي پاملرنه وکړي.
