په لغمان ولایت کې د یو پایه ۱۰۰ متره پل د رغونې چارې د څه باندې ۵۲ میلیونه افغانیو په ارزښت پیل شوې
د ا.ا.ا د تولګټو وزارت د ځایي اوسیدونکو د ستونزو د حل په موخه، د لغمان ولایت اړوند ده زیارت کلي د علیشنګ پر سیند د یو پایه پُل د رغونې چارې د څه باندې ۵۲ میلیونه افغانیو په ارزښت د لغمان ولایت والي قاري بختیار معاذ، د یاد ولایت ټولګټو رئیس ملا همایون احمدي، سیمه ییزو مسؤلانو او قومي مخورو په شتون کې پیل کړې.
دغه پل ۱۰۰ متره اوږدوالی او ۹.۳ متره پلنوالی لري، رغنیزې چارې یې د ټولګټو وزارت او خصوصي سکټور تر منځ قرارداد شوې دي چې د یوه کال په موده کې به یې کار بشپړ او ګټه اخیستنې ته وسپارل شي.
د یادې پروژې د کار په جریان کې په ورځنې ډول شاوخوا د سیمې ۱۰۰ تنو اوسېدونکو ته د کار زمینه برابریږي او په بشپړېدو سره به یې د سیمې ۵۰ زره کورنیو د تګ راتګ ستونزې هوارې شي، د سوداګریزو توکو او کرنیزو محصولاتو انتقال په برخه کې به ګڼ شمېر آسانتیاوې رامنځته شي.
