په کاپیسا ولایت د ۱۳ میلیونه افغانۍ په ارزښت د يوې ترميماتي پروژې چارې پیل شوي
د ا.ا.ا د ټولګټو وزارت له لورې په کاپیسا ولایت کې، د نجراب ولسوالۍ د جامع جومات اړوند د سړک يوه ترميماتي پروژه نن رسماً پیل شوه.
د یادې پروژې د پرانیستي په مراسمو کې د کاپیسا ولایت والي محترم قاري احسان الله بریال، د یاد ولایت د ټولګټو رئیس محترم مولوي بحرالله بدري، د نجراب ولسوالۍ ولسوال محترم مولوي عطاالله نعمت، قومي مخورو، دیني عالمانو او ځوانانو ګډون کړی وو.
په ياده ترمیماتي پروژه کې د نجراب ولسوالۍ د جامع جومات اړوند د لوی پل، د عمومي سړک د فرش، د استنادي ديوالونو او پلګوټو ترمیم کول شامل دي، چې چارې يې د ټولګټو وزارت له لورې د ۱۳ میلیونه افغانۍ په ارزښت له خصوصي سکتور سره قرارداد شوي دي.
ځايي مسوولينو او اوسېدونکو د يادې پروژې د پرانيستنې هرکلی وکړ او دا یې د ا.ا.ا له لوري د سیمې د پراختیا او آبادۍ پر لور یو مثبت ګام وباله.
د يادونې وړ ده، چې د يادې پروژې په ګټې اخيستنې سره به د سیمې اوسېدونکو ته د تګ راتګ په برخه کې لازمې اسانتیاوې رامنځته شي او د استنادي دېوالونو او پلچکونو په ترمیم سره به د سېلابونو او موسمي بارانونو له امله د سړک له ویجاړیدو څخه مخنیوی وشي.
