د سالنګونو لويې لارې په اړه د ټولګټو وزارت خبرتيا

دا چې ټولګټو وزارت د سالنګونو لويې لارې د دريو برخو پاتې کار او د بيارغونې چارې پيل کړي دي؛ په همدې موخه د ټرانسپورټي چارو د لاښه تنظيم لپاره د ټولو باربري، مسافربري او ټرانسپورټي وسايطو له چلوونکو څخه هيله کيږي، چې د ۱۴۴۶ هـ. ق کال د محرم الحرام په ۱۹ مې نېټې چې د ۱۴۰۳ هـ. ش.  کال د زمري (اسد ) مياشتې له ۴مې  نېټې سره سمون لري  پر يا د مسير د تګ-راتګ پرمهال په لاندې ډول، وخت او نوبت په پام کې ونيسي.
کوچني وسايط: د يادو وسايط لپاره د سالنګونو لویې لارې اړوند د کار په ساحه کې بديل مسير رغول شوی چې د سهار له ۶:۰۰ بجو څخه د مازديګر تر ۶:۰۰ بجو پورې هره ورځ د دواړو خواوو تګ راتګ کولای شي.
باروړونکي او غټ مسافر وړونکي (۳۰۳، ۴۰۴ او ۵۸۰) وسايط: په نوبتي ډول د مازديګر له ۶:۰۰ بجو څخه د سهار تر ۶:۰۰ بجو يوه شپه له شمال څخه جنوب لورې ته او بله شپه له جنوب څخه شمال لورې ته په اصلی مسیر د تګ اجازه ورکول کيږي ؛ خو کوچنیو مسافروړونکو وسایطو ته د شپې  په دغه وخت د تګ را تګ اجازه نه ورکول کیږي.
د ټولګټو وزارت له ټولو هيوادوالو او موټر چلوونکو هيله کوي، چې پورتنی نوبت او ټرافيکي قوانين مراعت او د پروژې په ښه تطبيق کې د ساحوي کاري ټيمونو سره همکار و اوسي.
ټولګټو وزارت هڅه کوي، چې په هيواد کې د سړکونو په رغونې، بيارغونې او ترميم سره هيوادوالو او موټر چلوونکو ته آسانتياوې رامنځ ته کړي.