د سالنګونو لويې لارې د پاتې برخو کار د هوا په برابرېدو سره پيل کيږي
د ا.ا.ا د ټولګټو سرپرست وزير محترم الحاج ملا محمد عيسی ثاني پرون جمعه د سالنګونو د رئيس محترم حاجي فضل ربي او د پروان ولايت د ټولګټو رئيس مولوي عزت الله عارف په ملتيا د سالنګونو لويې لارې له اړوند برخو، د تونل او د ياد مسير په اوږدو کې له بشپړو شوو، پاتې برخو او د قراردادي شرکتونو د چمتوالي له بهير څخه ليدنه وکړه.
د ټولګټو سرپرست وزير د سالنګونو لويې لارې د قراردادي شرکتونو د تېرکال د پلان شویو برخو له بشپړېدو څخه د ليدنې ترڅنګ د شرکتونو مسوولينو ته لارښوونه وکړه، چې د پلان مطابق دې د پاتې برخو د کار پيل کيدو لپاره بشپړ چمتووالی ونيسي او د هوا د برابرېدو سره دې سم کار پيل کړي، ترڅو د ياد مسير پلان شوي رغنيز کارونه پر وخت بشپړ شي.
د يادونې وړ ده، چې ټولګټو وزارت تېرکال د سالنګونو لويې لارې د رغونې کار په دريو برخو کې پيل کړی وو، چې دامهال يې د تونل پر کانکريټ سربېره د ډېر شمېر ګالريو او د ګالريو ترمنخ د نښلونکو فاصلو د کانکريټ اچونې چارې بشپړې شوي دي او د خنجان-دوشي د اسفالټ اچونې ځيني چارې هم بشپړې شوي دي.
