دایکندی: د رباط - میرامور سړک رغنیزې چارې ۶۲ سلنه بشپړې شوي
دا سړک چې ١٢.١٤٢ کیلومتره اوږدوالی، ٦ متره پلنوالی او د سړک دواړه غاړو ته دوه متره پلي لارې لري، د دایکندي ولایت د میرامور ولسوالۍ له رباط بازار څخه پیل او د دې ولسوالۍ تر اسیپلان سیمې پورې غځيږي، چې اوس مهال یې رغنیز کار له ۶۲.۴ سلنه کاري پرمختګ سره دوام لري.
د یاد اسفالټ سړک د رغنیزو چارو تړون د ټولګټو وزارت له لوري له یوه خصوصي ودانیز شرکت سره لاس لیک شوی، چې ټول مالي لګښت یې د هېواد له پراختیایي بودیجې څخه ورکول کېږي.
د دې پروژې د رغنیز کار په بهیر کې، د سیمې ګڼ شمېر اوسېدونکو ته د کار زمینه برابره شوې، چې د چارو له بشپړېدو وروسته به یې، د میرامور ولسوالۍ د اوسېدونکو ټرانسپورټي ستونزې تر ډېره هواري شي.
ټولګټو وزارت د متوازنې پراختیا اصل ته په پام سره په دې ولایت کې د اسفالټ یا پخو سړکونو تر څنګ د جغلي او کانکریټي سړکونو ګڼې پراختیایي پروژې هم لري، چې د چارو له بشپړېدو سره به یې د اوسېدونکو ډېرې ټرانسپورټي ستونزې هوارې شي.
