زابل: د کابل – کندهار پر لویه لار د نورک پُل ترمیم او بیارغول کیږي
ټولګټو وزارت د کابل – کندهار پر لویه لاره د زابل ولایت د شاجوی ولسوالۍ اړوند د نورک پل چې طالبانو په بمونو الوزولی و اوس مهال ترمیم او بیارغوي. دا پل چې ۲۴.۶ متره اوږدوالی او ۸.۲ متره پلنوالی لري د موټرو د تګ راتګ پرمهال یې خلک له ګڼو ترانسپورتې ستونزو سره مخ کړي وو. د یاد پله د ترمیم او بیارغوني کار د ټولګټو وزارت له لوري له یوه خصوصي ودانیز شرکت سره د څه باندې ۴.۵ میلیونه افغانیو په ارزښت تړون شوی چې مالي لګښت یې د هیواد له پراختیايي بودیجې څخه ورکول کیږي. د یادونې وړ ده، چې ټولګټو وزارت د زابل ولایت اړوند د کابل – کندهار پر لویه لار دوه نور پلونه هم ترمیم او بیارغوي چې له کبله به یې د تګ – راتګ ستونزې د پخوا په پرتله کمې شي.