د ټولگټو وزارت اداري ناسته ترسره شوه
د ټولگټو وزارت اداري ناسته د جلسو په تالار کې د دې وزارت د سرپرست الحاج ملا عبدالمنان عمري په مشرۍ ترسره شوه، چې د وزارت مرستیالانو او یو شمیر رئیسانو په کې گډون کړی وو.
ناسته لومړی د قران عظیم الشان د مبارکو ایاتونو په تلاوت سره پیل شوه؛ ورپسې د ژمي په موسم کې د مواصلاتي لارو د پرانیستلو، د پراختیایي پروژو، د اوسپنې پټلۍ، د تلو همدارنگه د ادارو ترمنځ په همکاري او همغږۍ او اړوند نورو مسایلو باندې په تفصیل سره بحث وشو.
د نن ورځې په اداري ناسته کې فیصله وشوه، چې د رسمي چارو پر مخ وړلو لپاره دې ریاستونو ته نغدې پیسې ورکړل شي او یاد ریاستونه مکلف دي، چې د مصرف په اړه یې دقیقه محاسبه او بشپړ راپور وزارت مقام ته وړاندې کړي.
همدارنگه په تلو کې د بریښنا د نشتوالي ستونزه، د اوسپنې پټلۍ ادارې په اړه يو لړ پريکړې، له واحدي مرجع څخه اطلاع رسونه او یو شمیر نورو مهمو موضوعاتو باندې بحث وشو چې په اړه یې لازم تصمیمونه ونیول شول او تر څلور ساعته مسلسل بحث وروسته غونډه په اختتامیه دعا پای ته ورسېده.
