د کابل- غزني دویم لین سړک رغنیزې چارې په چټکۍ سره جريان لري
د ا.ا.ا ټولګټو وزارت د کابل - کندهار لویې لارې اقتصادي او ټرانزيټي اهمیت ته په کتو او د پخواني لین سړک څخه د ګڼې ګوڼې د راکمېدو او ترافیکي پېښو مخنیوي په موخه د کابل – غزني لویې لارې د دویم لین سړک د اساسي رغونې کار په بېلابېلو برخو کې پیل کړی دی، چې دغه دویم لین سړک به په راتلونکي کې تر کندهار ښار پورې وغځول شي.
د کابل – غزني دویم لین سړک، چې ټولټال ١١١ کیلو متره اوږدوالی لري، او رغنیزې چارې یې په بېلابېلو برخو ویشل شوې دي، چې دا مهال یې د اساسي رغونې کار په لومړۍ، درېیمه او پنځمه برخه کې جریان لري، په یادو درېیو برخو کې ۷۲۳ تنه تخنیکي، فني او غیر فني کارکوونکي او ۳۷۸ عرادې مختلف النوع ماشینري په کار بوخت دي.
د کابل – غزني دویم لین سړک په اوږدو کې د ۴ پایو لویو پلونو، ۳۱۷ پایو پلګوټو او د یو شمېر استنادي دېوالونو د اساسي رغووني کار هم شامل دی، چې چارې یې د معیاري او انجنیري اصولو مطابق ترسره کیږي.
د دې پروژې د مالي لګښتونو د برابرولو لپاره، ټولګټو وزارت د کابل – کندهار پر لویه لار ټولپلازا فعاله کړې ده، چې ټول عواید یې په یو مشخص بانکي حساب کې جمع کېږي. ټولګټو وزارت خلکو ته ډاډ ورکوي، چې د دوی یوه افغانۍ هم بې ځایه نه لګول کیږي او دا پیسې یوازې د همدغه سړک د رغونې لپاره مصرف کېږي.
