خوست: په باک ولسولۍ کې د ۱۱ کیلومتره سړک رغنیزې چارې د بشپړېدو په حال کې دي
دا اسفالټ سړک چې ۱۱.۶۸ کیلومتره اوږدوالی لري، د خوست ولایت د باک ولسوالۍ له مرکز څخه د علي شېر ولسوالۍ تر ترزایي بازار پورې غځیدلی، چې اوس مهال یې رغنیز کار ۹۸.۶۸ سلنه بشپړ شوی او په نیږدي راتلونکې کې به ګټې اخیستنې ته وسپارل شي.
دا پروژه د ۱۲۴ میلیونه افغانیو په ارزښت د ټولګټو وزارت له خوا پر مخ وړل کیږي چې لګښت یې د هېواد له پراختيايي بودیجې څخه ورکړل شوی.
د دې پروژې د رغنیز کار پرمهال د سیمې اوسېدونکو ته په مستقیم او غیرمستقیم ډول ۱۵۴۵۰ کاري ورځې رامنځته شوې او ګټې اخیستنې ته تر سپارلو ورسته به پر دې سړک ۸۲۰۰ کسان په مستقیم ډول تګ راتګ کوي.
د یاد سړک د رغنیز کار له بشپړېدو سره به د سړک اړوند کلیو ترڅنګ د خوست ولایت د باک، علي شیر او ځاځي میدان ولسوالیو د اوسېدونکو ټرانسپورټي ستونزې هوارې او همدارنګه به کرنیز او سوداګریز توکې د پخوا په پرتله په اسانه توګه د خوست ولایت مرکز ته لیږل کیږي.
