د بلخ-هرات او هرات-کندهار د اوسپنې پټلۍ د ټاکل شويو مسيرونو د تائيدۍ په تړاو د همغږۍ دويمه ناسته وشوه
د ا.ا.ا د رياست الوزراء عالي مقام د حکم په اساس؛ د ټولګټو وزارت د تخنيکي مرستيال محترم مولوي عبدالکریم فاتح په مشرۍ د بلخ-هرات او هرات-کندهار د اوسپنې پټلۍ د ټاکل شويو مسيرونو د تائيدۍ په تړاو د مربوطه وزارتونو او ادارو له مرستيالانو سره د همغږۍ دويمه ناسته ترسره شوه.
په ناسته کې د يادو مسيرونو د اقتصادي اهميت او د تخنيکي چارو د ارزونې په موخه د ګډونوالو ترمنځ مفصل بحثونه ترسره شول او پرېکړه وشوه، چې په نږدې ورځو کې به ګډ پلاوی ددغو پروژو د ټاکل شويو مسيرونو د تائيدۍ لپاره تصميم ونيسي او وروسته به د راپور جريان د رياست الوزراء عالي مقام سره شريک کړي.
ټولګټو وزارت د بلخ-هرات او هرات-کندهار مسيرونو سروې او مطالعات ترسره کړي دي او دا مهال يې چارې روانې دي.
