د تګاب – سروبي مسیر د ګارد ریلونو د نصب پروژه پیل شوه

د تګاب – سروبي پر مسیر د ګارد ریلونو (کټارو ) د نصب پروژه ، د ۱۲ میلیونه او ۶۰۰ زره افغانیو په ارزښت، د ا.ا.ا د ټولګټو وزارت له لوري له خصوصي سکتور سره قرارداد شوې ده. دغه پروژه د کاپیسا ولایت د والي محترم قاري احسان الله بریال، د ټولګټو رئیس محترم مولوي بحرالله بدري، سیمه‌ییزو مسئولینو او قومي مخورو په شتون کې رسماً افتتاح او پیل شوه.

یاده پروژه د تګاب–سروبي پر مسیر د شینکي په سیمه کې د هېوادوالو د سر او مال د خوندیتوب او د ترافیکي پېښو د مخنیوي په موخه تطبیق کېږي.

د سیمې خلک د یادې پروژې له پیل څخه خوښ دي او وايي، چې د دې پروژې په بشپړېدو سره به پر یاد مسیر د ترافیکي پېښو کچه تر ډېره راټیټه او د موټرچلوونکو او مسافرو د تګ راتګ خوندیتوب به لا زیات شي.