د غزني ولایت اړوند د خوګیاڼیو ولسوالۍ ۲۵ کیلومتره سړک د اساسي رغونې چارې د ۷۵۷ میلونه افغانیو په ارزښت پیل شوې
د ا.ا.ا د ټولګټو وزارت له لوري د غزني ولایت اړوند د خوګیاڼیو ولسوالۍ سړک د اساسي رغونې چارې د ۷۵۷ میلونه افغانیو په ارزښت له خصوصي سکتور سره قرارداد شوې دي، چې نن د غزني ولایت د مرسیتال والي محترم حافظ عبدالرشید عمري، د یاد ولایت د ټولګټو رئیس محترم ملا عبدالولي طیب احمد او یو شمېر نورو سیمه ییزو مسئولینو په شتون کې پیل شوې.
یاد سړک ۲۵ کیلومتره اوږدوالی لري، چې د غزني ولایت له موی مبارک څخه پیل د خوګیاڼو ولسوالۍ څخه په تېرېدو د یاد ولایت تر جغتو ولسوالۍ پورې رسېږي او په اوږدو کې یې د ۱۵۷ پایې پلګوټو او ۷۵۰ متره استنادي دېوالونو د رغونې کار هم شامل دی او کار به یې د ۲ کالو په موده کې بشپړ او ګټې اخیستنې ته و سپارل شي.
د یادې پروژې د پلي کېدو په جریان کې به د سیمې یو شمېر اوسېدونکو ته د کار زمینه برابره شي، او په بشپړېدو سره به یې د خوګیاڼیو ولسوالۍ د اوسېدونکو د تګ راتګ او د کرنیزو محصولاتو د لېږد ستونزې هوارې شي.
دا په داسې حال کې ده، چې د ټولګټو وزارت د هېواد په بېلابېلو ولایتونو کې د هېوادوالو د ترانسپورتي او ټرانزیټي ستونزو د حل په موخه د ګڼ شمېر رغنیزو پروژو چارې پیل کړې دي، چې دا مهال عملاً جریان لري.
