د ټولګټو وزارت سرپرست وزیر بامیان ولایت ته سفر وکړ
د ټولګټو وزارت سرپرست وزیر محترم الحاج ملا محمد عیسی ثاني په داسې حال کې چې يو تخنيکي ټيم يې ملتيا کوله، د روان کال دپنج شنبې په ورځ د بامیان - غور او د دغه ولایت اړوند دکار لاندي پروژو څخه له نږدې لیدنې په موخه بامیان ولایت ته سفر وکړ.
په دغه سفر کې د بامیانو والي محترم مولوي عبدالله سرحدي، د غور والي محترم مولوي احمد شاه دین دوست، د غور ولایت د امنیه قومندان محترم مولوي صدیق الله شاهین مسافر، د یکاولنګ ولسوالۍ؛ ولسوال محترم حکمت حسین مجاهد او یو شمېر نورو سېمه اېزو مسؤلینو د ټولګټو وزارت د سرپرست وزیر ملتیا کوله؛ د نورکه درې، بکک کوتل او سرکنک دَرې له درې لارو څخه چې د باميانو ولایت له غور ولایت سره نښلوي، د رغونې په موخه د یکاولنګ ولسوالۍ - غور ولایت د لعل سرجنګل ولسوالۍ د سرچشمه کوتل سمې پورې له نږدې لیدنه وکړه.
د بامیانو او غور ولایتونو محترمو والي صاحبانو او ورسره مل پلاوي، د اجتماعي او اقتصادي پلوه د دغو دريو لارو له څیړنې او ارزونې ورسته؛ د نورکه درې لاره چې شاوخوا ۴۰ کیلومتره اوږدوالی لري غوره او تثبیت کړه.
د ټولګټو وزارت سرپرست وزیر د دغه وزارت تخنیکي ټیمونو ته لار ښونه وکړه چې د ا.ا.ا د محترمې رهبرۍ لخوا د دغه سړک د رغونې له منظورۍ وروسته دې د خلکو د ترافیکي ستونزو د حل په موخه د ياد سړک تخنيکي مراحل تکمیل او ورسته به یې عملي چارې پيل شي.
د يادونې وړ ده چې په دغه سفر کې د ټولګټو وزارت سرپرست وزیر په باميان ولایت کې د دغه وزارت، تر کار لاندې پروژو څخه هم ليدنه وکړه او د یاد ولایت د ټولګټو رياست تخنیکي ټيمونو او د قرار دادي شرکت مسؤلینو ته يې د کار د چټکتيا او غوره والي په هکله لازمې لارښوونې وکړې.
