د کابل – کندهار لویې لارې اړوند د کمپنۍ د دویم پله رغنیزې چارې بشپړې شوې
د ا.ا.ا د ټولګټو وزارت له لوري د کابل–کندهار لویې لارې اړوند، د کابل–غزني د دویم لین سړک په اوږدو کې د کمپنۍ د دویم پله رغنیزې چارې د ۶۰ میلیونه افغانیو په ارزښت بشپړې شوې او د ټولګټو وزارت د تخنیکي مرستیال او کفیل، محترم الحاج مولوي عبدالکریم فاتح، د دغه وزارت د تخنیکي رئیسانو، د قراردادي شرکتونو د مسؤلینو، د رسنیو استازو او قومي مشرانو په شتون کې ګټې اخیستنې ته وسپارل شو.
د یاد پله د پرانیستې په مراسمو کې د ټولګټو وزارت تخنیکي مرستیال او کفیل، محترم الحاج مولوي عبدالکریم فاتح وویل، « اوس د هر وخت په پرتله د بنسټیزو پروژو د پلي کېدو زمینه برابره شوې ده، چې د هېواد ټولې پراختیایې پروژې ا.ا.ا له بودیجې څخه په ګټې اخیستنې تطبیق کیږي. دلیل یې دا دی چې د فساد، خیانت او غلا مخنیوی شوی دی».
نوموړي زیاته کړه، چې د کابل–غزني لویې لارې د دویم لین سړک رغنیزې چارې په درېیو برخو کې پیل شوې وې، چې سږ کال پکې د لومړۍ او پنځمې برخې د څه باندې ۳۲ کیلومتره سړک د لومړۍ او دویمې طبقې د اسفالټ چارې بشپړې شوې دي، او پاتې چارې به یې، انشاءالله، په راتلونکي کال کې بشپړې او ګټې اخیستنې ته وسپارل شي.
د مراسمو په لړ کې د ټولګټو وزارت ویاند، محمد اشرف حقشناس، وویل چې دغه پل ۵۶ متره اوږدوالی او ۱۳.۵ متره پلنوالی لري، چې ۱۱ متره یې د موټرو د تګراتګ لپاره او ۲.۵ متره یې د پلي تګ لپاره رغول شوی دی. د یاد پله رغنیزې چارې د ۹ میاشتو په موده کې بشپړې شوې دي.
د یادې پروژې په بشپړېدو سره، پر یادې لویې لارې تګ راتګ کوونکي مسافر او موټرچلوونکي خوښي څرګندوي او وایي، چې له دې وروسته به پر پخواني پله ترافیکي ګڼهګوڼه د پخوا په پرتله کمه شي او خلک به په آسانۍ سره تګ راتګ وکړي.
د سیمې یو شمېر اوسېدونکي هم د یادې پروژې په بشپړېدو خوښ دي او له اسلامي امارت څخه د ورته نورو پراختیایي پروژو د تطبیق غوښتنه کوي.
