د کابل – کندهار لویې لارې د پاتې برخو د کار بیا پیلېدل او د یادې لویې لارې څخه د ټولګټو وزارت د سرپرست وزیر ليدنه
د ا.ا.ا د ټولګټو وزارت سرپرست وزیر محترم الحاج ملا محمد عیسی ثاني کندهار ولایت ته د خپل کاري سفر په ترڅ کې د کابل – کندهار لویې لارې د بېلابېلو برخو له کاري بهير څخه ليدنه وکړه.
د ا.ا.ا ټولګټو وزارت د کابل – کندهار لویې لارې د پاتې برخو د اساسي بیارغونې چارې بیا پیل کړې دي او په بېلا بېلو برخو کې یې عملاً کار جریان لري.
د ټولګټو وزارت محترم سرپرست وزیر کندهار ولایت ته د سفر پرمهال د کابل – کندهار لویې لارې څخه پر لیدنې بسربېره، د یادې لویې لارې د قراردادي شرکتونو له مسوولینو، مؤظفو تخنيکي ټيمونو او انجنیرانو سره هم وکتل او د ټولو برخو شرکتونو او مسؤلینو ته یې د کار د چټکتیا، غوره کیفیت او پر وخت د چارو د بشپړولو په تړاو لارښوونه وکړه او زیاته یې کړه چې د سړک د بشپړو شويو برخو شولډرونه دې په اساسي ډول ورغول شي.
همدا رنګه د قراردادي شرکتونو مسؤلینو او تخنیکي ټیمونو د تولګټو وزارت سرپرست وزیر ته ډاډ ورکړ، چې په ټول توان سره هڅه کوي، چې د یادې لویې لارې د اساسي بیارغونې کار د تخنیکي مشخصاتو سره سم پر وخت بشپړ کړي.
دا په داسې حال کې ده، چې د ټولګټو وزارت د کابل – کندهار لویې لارې د اساسي بیارغونې چارې په بېلابېلو برخو کې پيل کړې وې، چې په اوږدو کې یې د زیات شمېر پُلګوټو او لویو پلونو د ترمیم او بیارغونې کار هم شامل و، دا مهال ديادې لویې لارې د څه باندې ۴۳۰ کیلومتره سړک د لومړۍ او دویمې طبقې د آسفالت اچونې کار بشپړ شوی دی او همدا رنګه د ځینو برخو د دریمې طبقې اسفالټ هم بشپړ شوی دی.
د یادونې وړ ده چې د ا.ا.ا د ټولګټو وزارت تېرکال د کابل – غزني لویې لارې د دویم لین سړک د رغولو کار په دوو برخو کې د کابل له لوري پیل کړی و او سږکال یې د رغونې کار د غزني ولایت له لوري هم پیل شوی دی.
