د کاپیسا په کوهستان ولسوالۍ کې د ۲.۶ کیلومتره سړک چارې ۲۵ سلنه پرمختګ لري
دا کانکریټي سړک چې ۲.۶ کیلومتره اوږدوالی لري، د کاپیسا ولایت د کوهستان حصه اول ولسوالۍ اړوند د میر مسجدي جومات له سړک څخه پیل تر حمزه خیل کلي پورې غځیږي چې اوس مهال یې رغنیز کار له ۲۵ سلنه کاري پرمختګ سره دوام لري.
د سړک دا پروژه د ټولګټو وزارت له لوري له یوه خصوصي ودانیز شرکت سره تړون شوی چې مالي لګښت یې د هیواد له پراختیایې بودیجې څخه ورکول کیږي.
د دې پروژې د رغنیز کار په جریان کې د کوهستان ولسوالۍ اوسېدونکو ته ګڼې کاري ورځې رامنځته شوي چې د چارو له بشپړیدو سره به یې حمزه خیل، غفار خیل او کجې ملک بابه کلیو په شمول ګڼ نور کلي سره وصل شي او ترانسپورتي ستونزې به یې د پخوا په پرتله هوارې شي.
