د کندوز ښار د ماسټر پلان پر لومړني سړک رغنیز کار پیل شو
د ښاري ښکلا او ټرانسپورټي ستونزو د هواري په موخه ټولګټو وزارت په کندوز ښار کې د ماسټر پلان پر لومړني پراخ سړک کار پیل کړ چې له چوک څخه د هوايي ډګر تر سړک پورې غځيږي.
دا سړک ټولټال ۷.۹۷۰ کیلومتره اوږدوالی لري چې له چوک څخه تر څه باندې دوه کیلو مترۍ پورې یې پلنوالی د ۳۹ او ۴۵ مترو تر منځ او د پاته برخې لپاره یې ۲۰ متره سور ډیزاین شوی دی چې ګلدانونه او پلې لارې به هم ولري.
د دې سړک د کار پیل پټی د کندوز د سیمه ییزې ادارې د رهبرۍ له خوا پرې شوه چې د څخه باندې یو کال په اوږدو کې به یې رغنیزې چارې بشپړې شي.
د دغه پراخ سړک تړون د نږدې ۲۵۰ میلیونه افغانیو په ارزښت د ټولګټو وزارت له خوا له دوو ودانیزو شرکتونو سره لاسلیک شوی چې مالي لګښت یې د هیواد له پراختیایي بودیجې څخه ورکول کیږي.
د کندوز ښار د دې ښکلي سړک په پروژه کې د ۳۰۰ پایو سولرې څراغونو د لګولو تر څنګ د پلو لارو، ګلدانونو، ۲۵ پایو پُلګوټو او ۴۱۹۱ متره لښتیو جوړول هم شامل دي.
