د ټولګټو سرپرست وزیر د قزاقستان د لومړي وزير له مرستيال سره وکتل

 د ټولګټو وزارت سرپرست وزیر محترم الحاج ملامحمدعیسی ثاني د قزاقستان هیواد د لومړي وزیر له مرستیال ښاغلي ژومانگارين او مل پلاوي سره په داسې حال کې په خپل کاري دفتر کې لیدنه وکړه، چې د دغه وزارت تخنيکي او د اوسپنې پټلۍ مرستيالانو هم شتون درلود او د دواړو خواوو ترمنځ د اقتصادي، سوداګریزو، ټرانسپورټي او لوجستيکي همکاریو پر پراختیا، اوسپنې پټلۍ جوړونې او يوشمېر نورو اړونده موضوعاتو خبرې اترې وشوې.
په ليدنه کې دواړو لوريو د قزاقستان او افغانستان له لارې د ريل پټلۍ دهليز د سيمه ييز اتصال د پراختيا او د دواړو هيوادونو ترمنځ د سوداګريزو او اقتصادي اړيکو د پراخېدو او تداوم لپاره ارزښتناک فرصت وباله. 
د ټولګټو وزارت سرپرست وزیر د قزاقستان هیواد د لومړي وزیر مرستیال او مل پلاوي ته د ښه راغلاست ترڅنګ ډاډ ورکړ، چې د افغانستان اسلامي امارت لېواله دی، چې له قزاقستاني لوري سره په اقتصادي، تجارتي او ټرانسپورټي برخو کې اړيکې او همکارۍ لا پراخې کړي، ځکه چې اوسمهال په افغانستان کې بهرنيو پانګوالو ته د پانګونې بهترین فرصت برابر دی.
د قزاقستان د لومړي وزير مرستيال افغانستان په سيمه کې د قزاقستان لپاره مهم او نه بېلېدونکی شريک وباله او زياته يې کړه، چې هېواد يې تل افغانستان سره په سوداګریزو او اقتصادي برخو کې اړيکې ساتلي دي.
ښاغلي ژومانگارين وويل، قزاقستان غواړي د تورغونډۍ-هرات په اوسپنې پټلۍ باندې د ۵۰۰ میلیونه امريکايي ډالرو په ارزښت پانگونه وکړي او په هرات ولايت کې يو معياري ټرانسپورټي او لوجستيکي مرکز جوړ کړي.
نوموړي زياته کړه، چې قزاقستاني شرکتونه ليوالتيا لري، چې د ټولګټو وزارت د سړک جوړونې او اوسپنې پټلۍ په پروژو کې ګډون وکړي دامهال هم يو قزاقستانی شرکت د خواف-هرات د اوسپنې پټلۍ د يوې برخې د رغونې چارې ترسره کوي.
د ليدنې په لړ کې د ټولګټو وزارت د اوسپنې پټلۍ د مرستيال او د قزاقستان د سوداګرۍ وزارت د مرستيال ترمنځ د دواړو هيوادونو ترمنځ د راتلونکو دوامداره همکاريو په تړاو صورت جلسه هم لاسليک شوه.
په پای کې د دوه اړخيزه تجارتي او اقتصادي اړيکو پر پراختيا او تداوم ټینگار وشو او پرېکړه وشوه، چې د اړونده مسايلو د تطبيق په موخه به په راتلونکي کې د دواړو هيوادونو تخنيکي کمېټه ناسته وکړي.