د ټولګټو محترم وزیر جنوب لوېدیځ زون ته د سفر په ترڅ کې د یو شمېر پروژو له کاري بهیر څخه لیدنه وکړه
د ا.ا.ا د ټولګټو وزیر، محترم الحاج ملا محمد عیسی ثاني، جنوب لوېدیځ زون ته د خپل کاري سفر پر مهال، چې یو شمېر رئیسانو او تخنیکي انجینیرانو یې ملتیا کوله، د یو شمېر رغنیزو پروژو له کاري بهیر څخه لیدنه وکړه.
د ټولګتو وزارت محترم وزیر په دغه سفر کې د شمال – جنوب دهلیز د یوې برخې ( د کندهار – ارزګان ۵۰ کیلومتره سړک)، د کندهار ولایت د ارغنداب ولسوالۍ اړوند د سرکاري باغ – خواجه ملک پل پورې د ۹.۳ کیلومتره سړک د رغونې له چارو او د غه راز د کندهار ولایت د بای پاس ( حلقوي سړک) د لومړي لاټ ۲۱ کیلومتره سړک، چې د سروې چارې یې بشپړې او د ډیزاین چارې ۳۵ سلنه بشپړې شوې دي لیدنه وکړه.
د دغو پروژو چارې د ټولګټو وزارت له لوري له خصوصي سکتور سره قرارداد شوې وې او دا مهال په بېلا بېلو پرمختګونو سره په چټکۍ سره جریان لري.
د ټولګټو محترم وزیر د پروژو انجینرانو، تخنیکي ټیمونو، د پروژو مسؤلینو او د څارنې ټيمونو ته لارښوونه وکړه، چې د دغو پروژو چارې د ټولګټو وزارت د تخنیکي معیارونو او مهالوېش سره سمې پر مخ یوسي او د پروژو کار پر وخت او د انجنیري معیارنو سره سم بشپړ کړي.
د یادو پروژو مسوولینو ډاډ ورکړ، چې د پروژو چارې به په ټاکلي وخت او معیارونو سره بشپړې کړي.
دا په داسې حال کې ده، چې د ټولګټو وزارت محترم وزیر د تیرې پنجشنبې په ورځ د کابل - کندهار لویې لارې په اوږدو کې د پنځو جوماتونو د جوړولو پروژو له کاري بهیر څخه هم لیدنه او ارزونه کړې وه.
