د ټولګټو وزارت سرپرست د سالنګونو لویې لارې له کاري بهیر څخه لیدنه وکړه:
د ټولګټو وزارت سرپرست محترم الحاج ملا محمد عیسی ثاني، چې یو تخنیکي ټیم یې ملتیا کوله؛ د سالنګونو لویې لارې د رغنیزو چارو څخه له نږدې لیدنه وکړه. دیاد وزارت سرپرست په دغه سفر کې د ۱۶ مې؛ ګالرۍ له کاری بهیر، د تونل له رغنیزو چارو او په دغه مسیر کې د سالنګونو د ساتنې او څارنې او د قرار دادي شرکتونو له کرش پلانټونو، کانکریټ پلانټ او د ساختماني مواد له تولید څخه لیدنه وکړه. د ټولگټو وزارت سرپرست په دې سفر کې د سالنګونو ریاست مسؤولینو او د شرکت له مسؤلینو سره څو ګډې ناستې ترسره کړې، چې په دغو ناستو کې د یاد وزارت سرپرست اړوندو مسؤولینو ته د پروژو د کار د چټکتیا، غوره کیفیت او د پلان مطابق د دغې پروژې د کار د بشپړولو په موخه لازمې لارښوونې وکړې او زیاته یې کړه: د سالنګونو لویه لار چې د هیواد یوه له صعب العبور لویو لاروڅخه ده او د کار د ترسره کولو موده یې لنډه ده، نو د ژمې موسم له را رسېدو مخکې باید د دغې پروژې د پلان شویو برخو کار بشپړ شي. د سیمې خلک او مسافران د سالنګونو لویې لارې د کاري بهیر په پیلېدو خوښ دي او د ټولګټو وزارت څخه د پروژې د کار د څارنې اوغوره کیفیت غوښتنه کوي. د سالنګونو لویه لار؛ یوه مهمه ټرانزیټي او اقتصادي لویه لار ده، چې د هېواد په ۹ شمالي ولایتونو سربېره څلور لوی سوداګریز بندرونه له مرکز کابل سره وصلوي، همدارنګه د یادونې وړ ده، چې د یادې پروژې د کار په جریان کې زیات شمېر کسانو ته د کار زمینه هم برابره شوې ده.