د ټولګټو وزارت تخنيکي او اوسپنې پټلۍ مرستيالانو د قزاقستان د ټرانسپورټ او صنعت او ساختمان وزارتونو له مرستيالانو سره وکتل
د ا.ا.ا د ټولګټو وزارت تخنيکي مرستيال محترم الحاج مولوي عبدالکريم فاتح، د اوسپنې پټلۍ مرستيال محترم الحاج مولوي محمد اسحاق صاحبزاده او تخنيکي ټيمونو د قزاقستان هيواد د ټرانسپورټ وزارت له مرستيال محترم (ژانيبک ژومايويچ تايژانوف)، د صنعت او ساختمان وزارت له مرستيال محترم (شرخان ايران شرخانويچ) او مل پلاوي سره د ياد هيواد د سفير محترم (گزیز اکباسوف) په شتون کې په خپل کاري دفتر کې وکتل.
په کتنه کې د ټولګټو وزارت تخنيکي مرستيال د قزاقستان هيواد راغلي پلاوي ته د ښه راغلاست ترڅنګ وويل، خوښ يو، چې افغانستان او قزاقستان يو بل سره تاريخي، اقتصادي، تجارتي او ټرانزيټي اړيکې لري او بايد هڅه وشي، چې دا اړيکې لا پراختيا ومومي.
د قزاقستان هيواد پلاوي د خپلو خبرو پرمهال وويل، چې د سفر موخه يې د تورغونډۍ – هرات او هرات – سپين بولدک اوسپنې پټلۍ پروژې د عملي پلان تطبيق کولو ته چمتووالی دی.
د ټولګټو وزارت د اوسپنې پټلۍ مرستيال د قزاقستاني لوري سره د ناستې په لړ کې د ټولګټو وزارت د روانو پروژو په تړاو هراړخيز تخنيکي معلومات وړاندې کړل او زياته يې کړه، چې دامهال د ټولګټو وزارت له لوري د هرات – کندهار اوسپنې پټلۍ پروژې د سروې چارې بشپړې شوې او د ډيزاين چارې يې جريان لري.
د ليدنې په جريان کې، د ټولګټو وزارت او قزاقستاني لوري ترمنځ يوه صورت جلسه او عملي پلان (اکشن پلان) هم لاسليک شو او پریکړه وشوه، چې د تورغونډۍ – هرات او هرات – سپين بولدک اوسپنې پټلۍ پروژې د عملي چارو د پيل او د يادې پروژې د راتلونکو حقوقي او مالي شرايطو په تړاو د بحثونو لپاره يوه مشترکه تخنيکي او مالي کمېټه رامنځته شي، چې په نږدې راتلونکي کې به په دې اړه د قزاقستان تخنيکي ټيم هم افغانستان ته سفر وکړي.
په پای کې ټولګټو وزارت قزاقستاني لورې ته ډاډ ورکړ، چې افغانستان د يادې پروژو د عملي کار پيل ته بشپړ چمتووالی لري او بايد دا پروژه د ا.ا.ا د نافذه قوانينو په رڼا کې تطبيق شي.
