د ټولگټو وزارت سرپرست د کابل – کندهار له لویې لارې څخه لیدنه وکړه
د ټولگټو وزارت سرپرست محترم الحاج ملا عبدالمنان عمري پرون د جمعې په ورځ د کابل – کندهار له لویې لارې څخه لیدنه وکړه.
د ټولگټو وزارت سرپرست محترم الحاج ملا عبدالمنان عمري زابل ولایت ته د یوه سفر په ترڅ کې د کابل – کندهار لویې لارې له ملینگ کاري، د یادې لویې لارې په اوږدو کې د دریو لویو پایو پلونو او گڼ شمیر پُلگوټو او په زابل ولایت کې د ترسره شویو پروژو له کاري بهیر څخه لیدنه وکړ.
د ټولگټو وزارت سرپرست په دې سفر کې د زابل ولایت له سیمه ییزو مسؤولینو او خلکو سره هم ولیدل او مسؤولینو ته یې د پروژو د کار د غوره کیفیت په موخه لازمې لارښوونې وکړې او زیاته یې کړه: خلکو ته د ترانسپورتي اسانتیاوو د رامنځته کولو په موخه د ترانسپورتي زیربیناو د رغولو لپاره هڅې کوي؛ هغه همدارنگه خلکو ته ډاډ ورکړ، چې د دغه وزارت له پلان او مالي وجوه سره سم به د نیمگړو پروژو د کار د پیل تر څنگ د نویو پراختیايي پروژو کار هم پیل کړي.
د یادوني وړ ده، چې د ا.ا.ا، له بریا ورسته ټولگټو وزارت د کابل – کندهار لویې لارې د میلینگ کاري، د دغه لویې لارې په اوږدو کې د دریو پایو پلونو گڼ شمیر پُلگوټو او په زابل ولایت کې د ځینو پروژو د بیارغونې چارې له خصوصي ودانیزو شرکتونو سره تړون کړې، چې دا مهال د ځینو پروژو کار بشپړ شوی دی او ځینې تر کار لاندې دي.
