سړکونه ملي شتمني ده، ساتنه او پالنه يې د هر افغان ملي او ديني وجيبه ده
ټولګټو وزارت د سړکونو د ساتنې او بیارغونې په برخه کې د خلکو د همکارۍ قدرداني کوي
====
د میدان وردګو ولایت ځوانانو د دې ولایت اړوند کابل ـ کندهار لویې لارې هغه برخې بیارغوي، چې د وسلوالو مخالفینو له لوري د سړک غاړو ماینونو او له ټاکلي اندازې څخه د ډېر باروړنکو موټرو له لوري ویجاړې شوې وې
د ټولګټو وزارت رهبري د میدان وردګو ولایت د ولسونو له دې کړنې مننه او قدرداني کوي، چې د هیواد په جوړلو کې خپل دیني رسالت او ملي مسؤلیت ادا کوي
د یادونې وړ ده، چې ټولګټو وزارت پلان لري د کابل ـ کندهار لویه لار په پاخه او اساسي ډول ترمیم او بیاورغوي، چې اوس مهال یې د سروي او ډیزاین لومړني کارونه پیل شوي، چې له بشپړيدو سره سم به يې د بیارغونې کار پيل شي
یاد وزارت له ټولو هیوادوالو څخه غواړي، چې د سړکونو، پُلونو او پُلګوټو په ساتنه او بیارغونه کې چې ملي شتمنۍ دي له دې وزارت سره لاس یو کړي
د ټولګټو وزارت ـ رسنیز دفتر
