د سالنګونو لویې لارې د تړل کېدو په اړه د ټولګټو وزارت اعلامیه!
د صفر المظفر۱۳مه، ۱۴۴۵
ټولګټو وزارت، د سالنګونو لویې لارې د ۸۰ کیلومتره سړک د اساسي ترمیم او بیارغونې کار پيل کړی، چې دا مهال یې کار عملاً جریان لري.
ټولګټو وزارت، ټولو درنو هېوادولو ته خبر ورکوي، چې د سالنګونو لویې لارې د تونل په دننه برخه کې د کانکریټ اچونې او د پروژې د غوره تطبیق په موخه؛ دغه لویه لار د یک شنبې په ورځ (۱۴۰۲هـ ش کال د سنبلې په ۱۹)، چې د ۱۴۴۵ هـ ق کال د صفرالمظفر له ۲۴ نیټې سره سمون لري، د تونل د کانکریټ اچونې کار تر بشپړېدو پورې د هر ډول ترافیکي وسایطو د تګ راتګ پرمخ تړل کېږي.
په همدې اساس ټولګټو وزارت، له ټولو درنو هېوادوالو، ملي سوداګرو او موټر چلونکو څخه غوښتنه کوي، چې د (۱۱) ورځو په لړ کې دې اړوند اړتیاوې پوره کړي.
همدارنګه؛ دا وزارت له خلکو او د یادې لویې لارې له مسافرو څخه د حوصلمندۍ غوښتنه کوي.
