د ټولګټو وزارت له لوري د وروستیو اورښتونو اوسېلابونو له امله د هېواد د یو شمېر بندو لویو لارو او سړکونو د پاکولو او پرانیستلو کار په چټکۍ سره جریان لري
دسالنګونو لویه لار د وروستیو اورښتونو او سېلابونو له امله د تېرې شپې لخوا د لنډ مهال لپاره د ترافیکو پرمخ تړل شوې ده، چې د سالنګونو د ساتنې او څارنې ریاست لخوا یې د بیرته پرانیستلو هڅې په چټکۍ سره روانې دي.
دغه راز، په بامیان ولایت کې د بامیان - سرپل لویه لار د غر ښویېدنې له امله، د یکاولنګ ۲ نمبر ولسوالۍ مسیر د پل کاشان په سیمه کې، په غور ولایت د غور - هرات لویه لار، په سمنګان ولایت کې دخُرم سرباغ ولسوالۍ او په فاریاب ولایت کې د مرکز – بل چراغ – ګرزیوان ولسوالیو مسیرونه د ورستیو موسمې اورښتونو او سېلابونو د راوتلو له امله د ترافیکو پرمخ تړل شوی دي چې د یادو ولایتونو د ټولګټو ریاستونو د پرسونل لخوا یې د ژر پرانیستلو هڅې په چټکۍ سره روانې دي.
همدارنګه، د نورستان ولایت ځینې نښلونکي مسیرونه، په ننګر هار ولایت کې د ښېوې ولسوالۍ مسیر او د بلخ ولایت د دره صوف، کشندې، چهار کنت او مار مل ولسوالیو مسیرونه هم د ورستیو سیلابونو له امله زیان من شوي وو، د اړوندو ولایتي ریاستونو له لوري د سېلابي موادو څخه پاک کاري او ترافیکو پر مخ پرانیستل شوي دي.
د یادونې وړ ده چې د ټولګټو وزارت سرپرست وزیر محترم الحاج ملا محمد عیسی ثاني ټولو ولایتي ریاستونو ته لارښونه کړې ده، چې د سېلابونو له امله بندې لارې دې ژر تر ژره پاک کاري او د ترافیکو پرمخ پرانیزي
