د اروزګان – کندهار ترمنځ د ۲۴ کیلومټره سړک د جوړولو چارې پیل شوې
د اروزګان ولایت له مرکز ترینکوټ ښار څخه د کندهار ولایت تر شاه ولي کوټ ولسوالۍ پورې د سړک ۲۴ کیلومټره برخه په پاخه او اساسي ډول جوړېږې چې اوس مهال یې رغنیزې چارې پیل شوې.
د یاد سړک د سروې او ډیزاین چارې څه موده وړاندې د ټولګټو وزارت له لخوا سرته رسېدلي وې، چې اوس مهال یې رغنیز کار د چټکتیا په موخه د ملي پراختیا شرکت له لوري ترسره کیږي او ټول مالي لګښت یې د ټولګټو وزارت لخوا ورکول کیږي.
ددغه سړک د رغیدا او اسفالټ ترڅنګ به د سړک په اوږدو کې پلونه، پلچکونه او د اوبو لښتي هم په پاخه او اساسي ډول سره جوړشي.
د سړک دا پروژه له مهمو ملي پروژو څخه دی چې له جوړېدو سره به یې د اروزګان ولایت د اوسېدونکو ترانسپورتي ستونزې هوارې شي همدارنګه به د اړوند سیمو اوسېدونکو ته کاري فرصتونه هم رامنځته شي.
