د کابل - کندهار لويې لارې د پاته برخو د اساسي ترميم او بیا رغونې کار پيل شوی دی
د ټولګټو وزارت سرپرست وزیر محترم الحاج ملا محمد عیسی ثاني د جمعې په مبارکه ورځ، ميدان وردک ولایت ته د خپل سفر په ترڅ کې د ياد ولایت اړوند د کابل - کندهار لويې لارې د څلورو برخو له کاري بهير څخه لیدنه وکړه.
لومړۍ برخه يې له کابل څخه پیل تر ارغندې سیمې پورې، دويمه برخه یې له دراني بازار څخه پيل دميدان وردګو ولایت اړوند تر زرني سیمې پورې، درېيمه برخه يې له زرني سیمې څخه پیل د یاد ولایت د سيد آباد ولسوالۍ تر مرکز او څلورمه برخه يې د سید آباد ولسوالۍ څخه پيل د ميدان وردګو ولایت تر عزيز قلعه سيمې پورې رسيږي، چې د اساسي ترميم او بیا رغونې کار يې څو ورځې وړاندې پيل شوی دی او مالي لګښت يې د ټولګټو وزارت له بوديجې څخه ورکول کيږي.
د ټولګټو وزارت سرپرست وزیر د يادو برخو اړوند قرادادي شرکتونو او مسؤلینو او د پروژو څارونکو ټيمونو ته لار ښونه وکړه چې د کابل - کندهار لويې لارې د يادو برخو کار په ښه کيفيت او ټاکل شوي وخت سره پای ته ورسوي.
د يادونې وړ ده، چې ټولګټو وزارت تېر کال د يادې لویې لارې کار په ۷ برخو کې پيل کړی وو، چې اوس يې د کار د چټکتيا او غوره تطبيق په موخه په بیلابیلو نورو برخو ويشلی دی.
د کابل - کندهار لويه لار د هېواد يوه له مهمو اقتصادي لویو لاروو څخه ده، چې ګاونډيو هېوادونو ته د کرنيزو او سوداګريزو توکو په لېږد رالېږد کې غوره اقتصادي رول لري او په اساسي ترميم او بیا رغونې سره به یې د کرنيزو او سوداګريزو توکو په چټک لېږد رالېږد کې د پام وړ اسانتياوې رامنځ ته شي
