د ټولپلازاوو په هکله د ټولګټو وزارت خبرتیا!
ټول هيوادوال په جريان کې دي، چې د ا.ا.ا د مشرتابه عاليقدر امیرالمؤمنین محترم شیخ القرآن والحدیث مولوي هبة الله آخندزاده (حفظه الله) د (206) او (1930) ګڼو حکمونو پر بنسټ د کابل –غزني، کابل – جلال آباد، سالنګونو او یو شمیر نورو لویو لارو په اوږدو کې د ټولګټو وزارت لخوا د سړکونو د رغونې په موخه ټولپلازاوې فعاله شوې دي.
په همدې اساس ټولګټو وزارت؛ د ملي دفاع له محترم وزارت، د کورنیو چارو له محترم وزارت، د استخباراتو له محترم لوی ریاست او د نورو اړونده نظامي ارګانونو له مسؤلینو او ټولو مجاهدينو څخه په ډیر درنښت هیله کوي، چې که څه هم د فعاله ټولپلازاوو په مسيرونو کې له دولتي پلیټ لرونکو وسایطو څخه د تګ راتګ پرمهال پیسې نه اخیستل کیږي، خو هغه وسایط چې شخصي پلیټ ولري او نظامي کسان ورڅخه ګټه اخلي؛ بايد پر یادو لویو لارو د تګ راتګ پرمهال د ټولپلازا تعیین شوی محصول اړوند مسؤلینو ته ورکړي.
ټولګټو وزارت له ټولو محترمو مجاهدینو څخه په ډير درنښت هیله کوي، چې د ټولګټو وزارت د ټولپلازا برخې له کارکوونکو سره همکاري وکړي او د ټولپلازا لرونکو لويو لارو څخه د عبور پرمهال هغوی ته ستونزې رامنځ ته نه کړي.
درانه هيوادوالو بايد ډاډه اوسي، چې له ټولپلازاوو څخه راټول شوي عواید په یو مشخص بانکي اکونټ کې راټولیږي او بيرته د همدې لویو لارو او سړکونو په رغونه مصرف کيږي
