د جلال آباد – کنړ عمومي سړک د ترافیکو پرمخ پرا نیستل شو
د تیرې شپې زلزلې له امله د کنړ ولایت اړوند د جلال آباد – کنړ عمومي سړک د څوکۍ او نورګل ولسوالیو ترمنځ سیمه کې شاو خوا د شپې ۱۲ بجې غر ښویدنه رامنځ ته شوې وه، چې له امله یې یاد سړک د ترافیکو پرمخ تړل شوی و.
د پیښې سره هم مهاله د تولګټو وزارت اړوند ولایتي ټیم سیمې ته ځان رسولی و او په پرلپسې هڅو یې یاده لویه لار بیرته پرانیستلې ده.
د ټولګتو وزارت محترم وزیر الحاج ملا محمد عیسی ثاني دا مهال خپله هم ننګرهار ولایت ته سفر کړی دی، د کنړ او ننګرهار ولایتونو د ټولګټو ریاستونو رئیسانو او ټیمونو ته یې لار ښونه کړې ده، چې د سړکونو د پاکولو ترڅنګ دې د پیښې په سیمه کې د اړوند نورو ټیمونو سره په هم غږۍ د زیان منو هېواد والو سره اړینه همکاري وکړي.
د یادونې وړ ده، چې دا مهال په سیمه کې د ځمکې خوځښتونه لیدل کیږي او په سیمه کې د یاد وزارت ټیمونه د لارو د پاکولو لپاره چمتو دي.
دغه راز د کنړ ولایت د مزاردرې او د ديوه ګل درې سرکونه هم د وسایطو د تګ راتګ پرمخ تدل شوې دي، چې د نورو ادارو د مؤظفو ټیمونو په همکارۍ سره یې د پاک کولو چارې کړندۍ روانې دي او هڅه کوي چې یاد مسیرونه بیرته پرانیزي.
د ټولګټو وزارت رهبري د یادې زړه بوږنونکې پیښې شهیدانو ته د اللهﷻ له ستر دربار څخه د جنت الفردوس او ټپیانوته د عاجلې روغتیا غوښتنه کوي.
