د تولګټو وزارت د اوسپنيزې کرښې مرستيال د مشهد له والي او یو شمېر سوداګرو سره وکتل
د ا.ا.ا د ټولګټو وزارت د اوسپنيزې کرښې مرستيال محترم مولوي محمد اسحاق صاحبزاده او مل پلاوي ایران ته د خپل رسمي سفر په ترڅ کې د خراسان رضوي د سوداګرۍ، صنایعو، کانونو او کرنې خونې له مسوولينو سره په جلا جلا غونډو کې د مشهد له والي او یو شمېر ایراني او افغان سوداګرو سره هم ليدنې ترسره کړې.
په لومړۍ غونډه کې، چې له مشهد والي سره ترسره شوه، د اوسپنې پټلۍ په برخه کې د دوه اړخیزو همکاریو، سوداګریزو انتقالاتو د زیاتوالي، اسانتياوو رامنځته کولو او يوشمير نورو اړونده موضوعاتو بحث وشو.
د مشهد والي د ريلي همکاریو د پراختیا هرکلی وکړ او ژمنه یې وکړه، چې په بېلابېلو برخو، لکه د کمېسارۍ او ګمرک چارو کې به اړینې همکارۍ وکړي.
په دویمه غونډه کې، چې د خراسان رضوي د سوداګرۍ خونې په کوربهتوب او د افغان او ایراني سوداګرو په ګډون ترسره شوه، په سوداګرۍ او ترانسپورت کې د شته فرصتونو او ستونزو ارزونه وشوه.
په دې غونډه کې د پانګونې جذب او د انتقالاتو د ظرفیت لوړولو پر اهمیت بحث وشو.
د تولګټو وزارت د اوسپنې پټلۍ معین د دواړو هېوادونو د سوداګرو ملاتړ او د سوداګریزو فعالیتونو د اسانولو لپاره د خپلې ژمنتیا څرګندونه وکړه.
دا سفر د افغانستان او ایران ترمنځ د رېل پټلۍ او سوداګرۍ په برخه کې د دوه اړخیزو همکاریو د پیاوړتیا په موخه ترسره شوی. د دې خبرو اترو هدف د انتقالاتو زیاتوالی، د اقتصادي چارو اسانتیا او د بنسټونو پراختیا وه.
د دواړو هېوادونو چارواکو د رېل پټلۍ د شبکو د پراختیا او د ګډو دهلېزونو پر جوړولو ټینګار وکړ
