د کابل – غزني لویې لارې د دویم لین څلورم لاټ ۲۲.۳ کیلومتره سړک رغنیزې چارې پیل شوې
د ا.ا.ا د ټولګټو وزارت له لوري د کابل – غزني لویې لارې د دویم لین څلورم لاټ ۲۲.۳ کیلومتره سړک رغنیزې چارې د ټولګټو وزارت او خصوصي سکتور ترمنځ قرارداد شوې دي، چې دا مهال یې رغنیزې چارې پیل او عملاً جریان لري.
د یاد سړک په اوږدو کې د ۲ پایو لویو پلونو، ۱۷۴ پایې پلګوټو، ۱۱۷۷ متره سنګکاري دېوالونو او ۱۹۹۰ متره اوسپنیزو کانکریټي ویالو د جوړولو چارې هم شاملې دي، چې د معیاري او انجنیري اصولو مطابق به ترسره شي.
دا مهال دیادې پروژې د ۱۰ کیلومتره سړک د هموار کارۍ، پرکارۍ، د ۲۰ پایو پلګوټو د کیندلو او د سید آباد ولسوالۍ د لوی پُل د کیندلو چارې جریان لري او همدا رنګه ۱۲ پایې پلګوټي د کانکریټ اچونې لپاره چمتو دي، چې چارې به یې پیل شي.
د کابل – غزني دویم لین سړک، چې ټولټال ۱۱۱ کیلومتره اوږدوالی لري، د لومړۍ، درېیمې او پنځمې برخې رغنیزې چارې یې تېر کال پیل شوې وې، چې له بېلابېلو پرمختګونو سره روانې دي او دا مهال یې د پاتې برخو چارې بیا پیل شوې دي.
