ننګرهار: د جلال آباد ښار اړوند هجرت کلي سړک رغنیز کار ۵۵ سلنه پرمختګ لري
د دې سړک لومړۍ برخه د جلال آباد ښار اړوند له درونټې بازار څخه تر هجرت کلي پورې د ۶.۹ کیلو مترو په اوږدوالي سره په دوو برخو کې جوړیږي چې ۶ متره پلنوالی، ۱۵ پلګوټي او ۹۰ متر مکعب استنادي دیوال لري.
د دې سړک دویمه برخه بیا له سرخ آب پُل څخه تر درونټي بازار پورې ۲.۸۶ کیلومتره اوږدوالی، ۹ متره پلنوالی، ۲ متره پلي لارې، ۱۵ پُلګوټي او ۱۷۰ متره استنادي دیوالونه لري چې چارې یې دا مهال ګړندۍ روانې دي.
د یاد سړک د رغنیزو چارو تړون د ټولګټو وزارت لخوا له یو خصوصي، ودانیز شرکت سره شوی چې مالي لګښت یې د افغانستان دولت له پراختیايي بودیجې څخه ورکول کیږي.
د دې سړک له جوړیدو سره به د ننګرهار مېوې او نور کرنیز حاصلات مارکیټونو ته په کم وخت کې رسېږي او همدا رنګه به روغتیایي او ښوونیزو مرکزونو ته هم د پخوا په پرتله د خلکو لاس رسي اسانه کړي.
