ټولګټو وزیر د لوګر ځوانانو شورا له غړو سره وکتل
د ټولګټو وزارت وزیر انجنیر نجیب الله یمین د لوګر ځوانانو سره د لیدنې پر مهال د سړکونو د رغونې او بیارغونې په موخه د دوی وړاندیزونه او غوښتنې واوریدي
په پیل کې د یادې شورا مشر عبدالباقي رشید او غړو یې د ټولګټو وزارت د وزیر بنسټیزې کړنې، وروستي اصلاحات، کاري پرمختګونه او د هېواد جوړونې په برخه کې د نوموړي مخلصانه هڅې او خدمتونه د قدر وړ وبلل او ورته یې د لا زیاتو خدمتونو او پرمختګونو هیله وکړه
راغلیو ځوانانو د پل عالم ښار د کړییز سړک، د خروار، څرخ او ازرې ولسوالیو او زرغون ښار او ورته نورو سیمو د یو شمېر سړکونو د رغونې او بیارغونې په موخه د لوګر د ولسونو غوښتنې د ټولګټو له وزیر سره د حل په موخه شریکې کړې
د ټولګټو وزیر د ځوانانو له وړاندیزونو وروسته د دوی غوښتنې پرځای وبللې او ویې ویل: سړکونه ملي شتمني ده، د ساتنې او څارنې برخې ته یې باید هر افغان ځانګړي پاملرنه وکړي
د ټولګټو وزیر انجنیر نجیب الله یمین د ټولو سترو او ملي سړکونو رغونه خپل کاري لومړیتوب یاد کړ او هم یې د لوګر د ځوانانو شورا غړو ته ډاډ ورکړ چې غوښتنو ته به یې ځانګړي پاملرنه وشي او په نژدې راتلونکي کې به یې د کاري چارو په موخه کوټلي ګامونه هم واخیستل شي
