د هېواد یو شمېر مسیرونه چې د وروستیو اورښتونو او سېلابونو له امله د لنډ مهال لپاره د ترافیکو پرمخ تړل شوي وو پاک کاري او ترافیکو پر مخ پرانیستل شول

د نورستان - کنړ عمومي سړک چې د تېرو ورځو دوامدواره اورښتونو او غر ښویېدنې له امله تړل شوی و د یاد ولایت د ټولګټو ریاست د کاري پرسونل له لوري پاک کاري او ترافیکو پر مخ پرانیستل شو خو په همدې ولایت کې د کامدیش ۔ برګمتال ، مندول ۔ دواب او وایګل ولسوالیو لارې د غره ښویېدنې له امله لا هم د ترافیکو پرمخ تړلي دي، چې د یاد ولایت د ټولګټو ریاست کاري پرسونل له لوري یې د پرانیستلو هڅې روانې دي.
همدارنګه د بدخشان ولایت د فیض آباد – بهارک مسیر، په تخار ولایت کې د تخار – بدخشان لویه لار او د فرخار – ورسج عمومي سړک د وروستیو سېلابونو له امله د ترافیکو پر مخ تړلي و چې د اړوندو ولایتي ریاستونو د کاري پرسونل له لوري پاک کاري او د ترافیکو پرمخ پرانیستل شول.
دغه راز په پکتیکا ولایت کې د سرحوضي – ارګون مسیر د غر ښویېدنې له امله، د کابل جلال آباد لویې لارې اړوند د لغمان ولایت په سرخکان سیمه کې د سېلابونو په پایله کې د محافظتي دېوالونو د تخریب له امله او د زابل ولایت د میزانې ولسوالۍ پر مسیر د تخریب شوي پلګوټي له امله ترافیکې ستونزې رامنځته شوې وې، چې د اړوندو ولایتي ریاستونو د کاري پرسونل لوري پاک کاري او یادې ترافیکي ستونزې هوارې شوې